Müed, aber glücklech simer am spätere Namittag wieder daheimä acho. Müed, wüu mir fasch nid hei chönne höre rutschbähnle u wüus üs im Flussbad so richtig düregspüeut het. Müed, wüu mir x-mau ufem Wasserparcour usgrütscht si u wieder hei müesse ufechlättere. Muetig wi Klippespringer simer sogar vom Feuse obe ache gumpet u die Erwachsene hei üs stouz apploudiert. Was hei mir gugelet u si vo eim Bereich zum angere gsecklet. Leider hets chli grägelet a däm Namittag - aber wemer ehrlech si, het üs das gar nid gstört.

Bevor mir mitem Bus ids Brigerbad si gfahre, hei d Vorsunntigschueu- u Sunntigschueulehrchräft no ä churzi Besprächig gha. Viu heisi gloub nid müesse bespräche, da mir ja immer ganz brav ir Sunntigschueu si, nie blödele u immer guet zuelose…

Vor dere Besprächig hei mir miter Gmeind Visp zäme ä schöne Gottesdienscht erläbt. Mir Ching hei sogar drü Lieder dörfe singe u so der Gottesdienscht mitgstaute. Das het richtig gfägt. Mir si fasch platzt vor Stouz, wo üs am Schluss die ganzi Gmeind klatschet het. I gloube die Grosse si begeisteret gsi, i ha sogar öpper gseh, wones Trändli im Oug verdrückt het.

Ds Bibuwort womer am Afang vom Gottesdiescht hei ghört isch mega läng gsi u ächt kompliziert. Äs isch usem erschte Chünigsbuech gsi, usem 19. Kapitu d Värse 11 u 12. Gang das mau go düreläse, der Elia het würklech krassi Sache erläbt. Dä hetsech nämlech ufem Bärg Horeb ire Höhli verchroche u da isch der lieb Gott vor ihm düregange.

Der Vorsteher vo Visp, ä Diakonin u der Vorsteher us Heimeschwand hei di Gschicht so spannend verzeut, dass aui wo si derbi gsi - Auti u Jungi - si drus cho. Sie hei drum nid eifach nume vom Autar obe abe prediget wie süsch immer, nei, si hei verschideni Gägeständ derbi gha u üs zeigt u mir hei sogar füre dörfe, dasmer aues ganz nach miterläbt hei. Uf de Föteli gsehsch wie das gange isch u wes di wunger nimmt, was d Erklärige zu dene Gägeständ si, fragsch am beschte öpper vo üs.

Scho am Morge früeh am Bahnhof z Thun hei mir äs paar vo üsne Fründe troffe u Witeri heimer speter ds Visp atroffe. Mir hei üs scho lang uf dä Tag gfröit, u sofort nachem Erwache isch klar gsi: Das git ä super Tag!

Bericht/Fotos: zVg
Bearbeitung: Brigitte Landmesser